Í tilefni dagsins

Í tilefni dagsins set ég hér á bloggið, tvö ljóð eftir Jónas Hallgrímsson. Þessi ljóð eru tekin úr bók í minni eigu, sem er gefin út árið 1883 af hinu Íslenska Bókmenntafjelagi. Fyrsta útgáfa var prentuð 1847 og varð uppseld fljótlega.

             BÓSI.

Bósi ! geltu, Bósi minn !

en bíttu ekki,  hundur !

ella dregur einhver þinn

illan kjapt í sundur

 

Hafðu ekki á þjer heldra snið

höfðingja sem brosa,

en eru svona aptan við

æru manns að tosa.

 

    VINDVÍSA

Þegi þú, vindur !

þú kunnir aldregi

hóf á hvers manns hag ;

langar eru nætur,

er þú hinn leiðsvali

þýtur í þakstráum.

 

Jónas Hallgrímsson

Harmleikur í Blacksburg - Virginia

Þetta er hræðileg frétt frá Virginia. Því miður, er þetta afleiðing þess að almenningur hefur aðgang að skotvopnum. Rétturinn til að verja sig er anzi sterkur í Bandaríkjunum og er einhvern megin greyptur í þjóðarsálina. Þetta skilur aðeins sá sem hefur búið þar í einhvern tíma og kynnst amerísku þjóðarsálinni.

Þess má geta að ég kom á þetta skólasvæði í Blacksburg á seinni hluta níunda áratugarins en þetta er stór háskóli með um 35.000 nemendur. Í þessari heimsókn, sá ég m.a minn fyrsta og eina ameríska fótboltaleik "live" og var það ógleymanleg reynsla.

 

Íslendingur óhultur eftir árás í tækniskólanum í Virginíu

Konur kítla pinnann í brekkunni.

Ég keyri Ártúnsbrekkuna tvisvar á dag og stundum oftar. Fyrir þá sem eru ekki kunnugir brekkunni og einu leiðinni austur úr Reykjavík, þá er hámarkshraði 80 km á klst. Yfirleitt keyri ég aldrei hraðar en leyfilegt er. Reynslan hefur kennt mér að á næstu ljósum kinka ég kolli anzi föðurlega til ökumannsins sem fór framúr mér nokkru áður á 110 km hraða.

Undanfarið hef ég gert skoðanakönnun. Hvaða ökumenn er þetta sem fara fram úr mér og keyra svona glæfralega á 100-110 km hraða ? Niðurstaðan kom mér á óvart. Meira en helmingur er kvenfólk og það í yngri kantinum, svona á milli 20 og 30 ára. Síðan er spurning, hvers vegna, hver er orsökin ?