Framsóknarblús

Eygló Harðar, Vestmannaeyjamær skrifar í bloggi sínu um helgina, pistil til varnar Frú Valgerði. Titill pistilsins er “Froðufellandi framkvæmdarstjóri ÞSSÍ” en þar vísar hún í samtal sem fréttamaður útvarpsins átti við Sighvat framkvæmdarstjóra ÞSSÍ og Sendi-herra.

 

Því verður ekki neitað að Sighvati var ansi mikið niðri fyrir en lái honum hver sem vill, Sighvatur var að fá fréttir um að stofnunin sem hann ber ábyrgð á, ætti að leggja niður og fella inn í utanríkisráðuneytið sem undirdeild.  Vekur þessi tímasetning furðu af hálfu ráðuneytisins að birta þessar upplýsingar opinberlega,  þegar forstöðumaðurinn er staddur í miðjum frumskógi Afríku og varla í símasambandi eins og heyra mátti af skruðningum sem voru á línunni í áðurnefndu viðtali.

 

Hitt er svo annað mál og lýsir jafnframt fyrri verkum hjá Frúnni að þessi stefnumótunarvinna er mjög ómarkviss. Það er verið að eyða peningum skattborgarana í vinnu sem er nánast marklaus. Það kom fram hjá Frúnni í blaðaviðtali að það var aldrei stefnan að semja um málið frumvarp, enda einungis ein vika eftir af þingi.

 

Nú er það svo að Framsóknarflokkurinn mun enda með 7-10 % fylgi í næstkomandi kosningum, þrátt fyrir mikla baráttu að koma sér ofar (tilvonandi kosningaloforð). Því miður er brautin þyrnum stráð, brostin og brotin kosningaloforð fyrri ára, valda og hagsmunapot sem kjósendur munu ekki fyrirgefa “FLOKKNUM”.  Það kemur því í hlut nýrra valdhafa að fara með lyklavöldin í utanríkisráðuneytinu og með nýjum manni koma nýir vindar og að öllum líkindum verður öll þessi vinna til einskis.

 

Hversu oft höfum við kjósendur ekki séð þetta leikrit áður ?  

Frjálsi fuglinn.

Sá aðeins fyrirsögnina á fréttinni um að Þorleifur frá Holti hefði sést í Suður-Englandi. Þetta vakti forvitni mína. Þetta hefði getað verið síðasti framsóknarmaðurinn flúinn að hólmi , nú eða einhver alræmdur bófi og hestaþjófur. Ég opnaði því fréttina til að lesa nánar um Þorleif frá Holti.

Nei, það kom í ljós að fréttin er um fallegan fugl sem skýrður var Þorleifur. Hann ferðast til Frakklands og Englands og þess á milli sækir hann okkur heim á klakann. Þorleifur þarf ekkert að spá í eftirlit ríkisins með ferðamönnum, þrátt fyrir að hafa vaðið alla svæsnustu drullupollana í France og UK. Nú og ekki þarf hann að eiga við ferðaskrifstofurnar og "flugfélögin tvö"  eins og við hin.

Fjölskyldan er þessa dagana að spá í sólarlandaferð. Án þess að hafa gert vísindalega samanburð á verði sumarið 2007 miðað við undanfarin tvö ár þá finnst mér samt sem áður að verðið hafi hækkað allnokkuð. Eitthvað rámar mig í að eigandi Heimsferða hafi fullyrt opinberlega fyrir um 2 árum síðan að verð á sólarlandaferðum ættu að lækka verulega fyrir íslendinga í kjölfar þess að Heimsferðir keyptu tvo mjög stóra ferðaheildsala á norðurlöndum ! Ekki get ég séð það á verðlagningunni.

Þorleifur frá Holti sást í Suður-Englandi

Khodorkovsky kallar á hjálp.

Ég horfði á viðtal við lögfræðing Mikhail Khodorkovsky í kastljósi gærkvöldsins hjá Rúv.  Þar kom ýmislegt fram í dagsljósið sem ég hafði áður nefnt og skrifað um hér á blogginu. ( Sjá Rússland og Pútín,14.12). 

Merkilegt er að Pútín sé búinn og hafi tekist að kæfa alla stjórnarandstöðu. Lögfræðingurinn taldi að komandi kosningar í Rússlandi  yrðu alls ekki lýðræðislegar, heldur frekar krýning á nýjum valdhafa. Síðan heldur sama valdastéttin um lykla og peningavöld í Gazprom og Rosneft en þessi stærstu fyrirtæki Rússlands eiga gífurlega fjármuni sem hægt er spila með. 

Það verður fróðlegt að sjá hvort utanríkisráðherra, eða staðgengill hennar muni hitta lögfræðingi M.K. Þar sem “Frúin” er nýkomin eða er á leiðinni frá S.Afríku, þá ætti hún að hafa lært eitt og annað í þeirri ferð um mannréttindi. Eða ætla íslensk yfirvöld að blessa jarðaför Mikhail Khodorkovsky. Hann átti þess að kost að losna úr fangelsi bráðlega en sú fangelsisvist hefur staðið yfir í tæp 4 ár. Nú hafa Pútin dátar búið til nýjar fals-ákærur þannig að “Gúlagið hið nýja” mun gleypa hann. 

Jafnvel skrifstofuveldið í Brussel hefur mótmælt þessum nýju ákærum.Hvað gerir Frúin !  Eða hvað segja hinir henni að gera ?   

Mikhail Khodorkovsky er hetja. Hann flúði ekki af hólmi með auðæfi sín til vesturlanda. Hann valdi það að mæta Pútín og hans kerfi þó að hann grunaði afleiðingarnar. Hann er holdgerfingur lýðræðis. Það þarf mikið hugrekki og æðruleysi að berjast fyrir réttlætinu. Hann hefur þetta allt. Spurningin er -   hvað gerum við íslendingar ?  

Verðbréf í U.S.A

Fyrir þá sem eru að taka stöður í verðbréfum í U.S.A þá vill ég benda á að hlutabréfamarkaðurinn hefur hækkað stöðugt síðan í september. Það er þriðja lengsta hækkunar tímabil í sögu markaðarins þar vestra. Hin tímabilin voru á öðrum og níunda áratug síðustu aldar og við vitum hvað gerðist í kjölfarið. Ég spái um 10 % “sjokki” innan tíðar.   (Þetta hljómar eins og nýja framboðið hjá Margréti Sverris sem átti víst að koma innan tíðar).

 

Það sem fer upp, kemur aftur niður. Vandamálið er að það fer mun hraðar niður en upp og að öllum líkindum á einum degi.

       

   

Frelsi og Lýðræði

Kúgunin í Hvíta-Rússlandi virðist ætla að halda áfram og versna. Hvað gerist næst ?  Verður beitt harðsvíruðu hernaðarvaldi á almenning landsins !  Hvað gerist ef einstaklingur sækir vefsíðu sem er ekki þóknanleg kúgunar-yfirstéttinni og "valdshöfum" - 5 ára fangelsi með hafragraut í öll mál.  Vona að það sé engin íslendingur í útrás, staðsettur þar í augnablikinu.  Þá gæti komið til aukavinna hjá utanríkisþjónustunni að ná mannskapnum út úr fangelsi fyrir að "brjóta lögin"

Annars sýnir þetta ástand í landinu og það árið 2007 að við skulum aldrei taka frelsi og lýðræði sem sjálfgefnu. Ég held að þessi frétt ætti að leiða til umhugsunnar fyrir hvern og einn hvað frelsi, lýðræði og mannréttindi eru dýrmæt.

Eftirlit með netnotkun í Hvíta-Rússlandi hert

Lestarslys á fjöllum.

Þessi lestarslys á fjöllum eru orðin kómísk og spurningin er, hvar er vinnueftirlit ríkisins og jafnvel lögreglan á Egilsstöðum!  Lögreglan gæti sent tvö menn á fjöll til umferðarstjórnunar og jafnvel hraðamælt í göngunum. Ítalir eru nú einu sinni þekktir fyrir að aka greitt. Þetta er því miður ekki fyrsta lestarslysið í jarðgöngunum og ljóst er að það vantar mikið upp á skipulag og öryggisstjórnun hjá verktakanum. Hvað er fyrirtækið að gera sem tók að sér eftirlit með framkvæmdunum fyrir 1,6 Miljarð króna fyrir hönd Landsvirkjunnar.

Meiddust lítið í lestarslysi og verða útskrifaðir í dag

Orka og Hugvit.

Í síðustu viku var gleðileg frétt í fjölmiðlum. Fyrirtækið ENEX hefur verið að skipuleggja og verið í framkvæmdum á nýrri hitaveitu í Kína. Einnig áformar ENEX að ljúka öðrum áfanga árið 2008 og það mun verða stærsta hitaveita fyrir utan Ísland. Þetta eru gleðileg tíðindi og ljóst mun vera að eftirspurn eftir íslensku hugviti á þessu sviði mun stór-aukast á næstu misserum.

 Í Kína eru um 2.000 þús. orkuver sem knúinn eru með kolum og þau setja út í andrúmsloftið um 670 miljónir tonna af koltvísýringi á ári hverju. Þetta gerir Kínverska alþýðulýðveldið að mengaðasta landi heims.

 Í Kína er mikil eftirspurn eftir rafmagni og einnig mikil þrýstingur á ráðamenn þar að minnka mengunina, þ.e.a.s að loka kola-orkuverunum. Þetta gerir áform Enex mjög spennandi þar sem markaðurinn  í Kína er gífurlega stór. Að vísu verður að nefna að það eru fleiri en Enex sem geta byggt upp hitaveitur en það eru fyrirtæki í Kaliforníu og norðurlöndum sem ráða við þessi verkefni og fjármögnun.

Kínverjar eru að setja mikla fjármuni í orkugeiran. Þeir áforma að reisa 2 til 3 ný kjarnorkuver á hverju ári og eru með 10 ára stefnumörkun á því sviði. Þeir eru líka með stór áform að sækja olíu til Afríku og eru þessa dagana að kaupa að heilu eða hálfu fyrirtæki á því sviði. Þeir hafa einnig nýverið gert samning við Ástralíu sem tryggir þeim úraníum en eftir því frumefni mun vera meiri eftirspurn en framboð og verðið fer stighækkandi á heimsmarkaði.

 Kinverjar eru einnig að reisa vindorkuver og eru þessar vikurnar að opna 49 MW orkuver sem minnkar CO2 um 110.000 tonn. Ég tel að það sé mjög stutt í það að vindorkuver verði reist á Íslandi. Því miður hafa stóru orkufyrirtækin ekki áhuga á þessu eins og er og þá er spurning hvort aðrir fjárfestar sjái ekki möguleika á þessu sviði. Samkvæmt nýju raforkulögunum á ekki að vera mál að selja raforku inn á landsnetið. Allaveganna á ekki að vera pólitísk hindrun líkt og gerðist með Irving Oil þegar þeir ætluðu að koma til landsins um árið.